المسحراتي – فؤاد حداد (8)
كتبت القصائد من صاحب ندا إلى مع السلامة في رمضان 1388
نوفمبر 1968
الأجر نور
ِ
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى
مـنـقـراتى
فى طلتى
بطبلتى
من جنب شارع
لجنب حاره
كان نجم والع
زى الشراره
من البخور
الدنيا حلوه
والريحه أحلى
سمعت غنوه
ورجلى نحله
فضلت تدور
وفى طلتى
بطبلتى
من حىّ رِيحْنا
لشيخ قريّب
قال يا ابنى احنا
عملنا طيّب
والاجر نور
خيالات صداقه
تسرح فى عينى
من ألف طاقه
بينكم وبينى
يا اهل الندور
وفى طلتى
بطبلتى
م الحاره دكها
للحاره ديّه
سمعنى ديكها
أدان هديه
يا شيخ سرور
الديك دا صايح
لازم نصحصح
اسمع نصايح
الى نصح صح
فى السحور
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
أنا قلبى غاوى اللبان والجاوى بخّرنا
يا طيبة الاسم يا دلنجات وبحّرنا
ولقبلى أسيوط فؤاد مبسوط وسحّرنا
حنيّة الليل قطعها الجرح يا ولادى
لما سمعنا المنادى ما تأخّرْنا
المسحراتي – فؤاد حداد (7)
