المسحراتي فؤاد حداد: أنا قلبي اسمي

أنا قلبى اسمي

اصحى يا نايم

وحّد الدايم

وقول نويت

بكره إن حييت

الشهر صايم

والفجر قايم

اصحى يا نايم

وحّد الرزاق

رمضان كريم

مســحـراتي
مـنـقـراتي
دي ليالي عمري
لبنى وتمري
والأمر أمري
أنا اللي علّم
حمام وقمري
قلت اللي علّم
في الجسم يمري
كان قلبى ليّن
يعرف يليّل
ومهما شيّل
عمره ما يرمي
عمره ماخبّا
ولا حتى حبّه
فَرْط المحبه
أنا قلبى اسمي
نحيف ولكن
أعلى المساكن
على كتفي راكن
وانا جبت عتله
تشد عزمي
وجبت عجلة
تدور بعلمي
علشان زماني
قام المصانع
وبنى المباني
رفع الموانع
فتح المواني
إلا الأغاني
زرعت ديواني
وكل مادا
مكلّفاني
عرق زيادة
ولا اقول كفاني
أصل السعادة
مبدأ تفاني
والمشي طاب لي
والدق على طبلي

ناس كانوا قبلي

قالوا فى الأمثال:

“الرجل تدب مطرح ماتحب”

* * *

وانا صنعتى مســحـراتي في البلد جوال
حبيت ودبيت كما العاشق ليالي طوال
وكل شبر وحته من بلدي

حتة من كبدي

حته من موال:
رمضان يا شهر الصيام شهر الكرم دايما
من قبل ما اطالِعك كان طالِعك أيمن
أنا الذى هام فى حب الذى هيمن
سجدت لله ولفيت البلد ودعيت
لا أوحش الله منك المسلمين أبدا

فؤاد حداد- 1964، من ديوان المسحراتي- الهيئة العامة للكتاب 2011