المسحراتي فؤاد حداد: صاحب مَزِيّة وأستاذية

صاحب مَزِيّه وأستاذيه

اصحى يا نايم

وحّد الدايم

وقول نويت

بكره إن حييت

الشهر صايم

والفجر قايم

اصحى يا نايم

وحّد الرزاق

رمضان كريم

مســحـراتي
مـنـقـراتي
يا سيداتي
و سـادتي

بعد التماسي
أنا التماسي
يدوم حماسي
وعادتي
أنا قلب أخضر
بفروع تجرجر
من الشجرجر
مـودتي

من غير أَذيّه
صاحب مَزيّه
وأستاذيّه
في مادتي

وانا فى انسجامي
ما انساش لجامي
تحكم كلامي
إرادتي

وباقول ياقافية
المعنى أفيد
ولا حرف أزيد
عن حاجتي

وانا اللي مؤمن
بالله ومؤمن
بالإنسانية
و بالتي

كـأنى من يـوم ولادتي

المشى طاب لي
والدق على طبلي

ناس كانوا قبلي

قالوا فى الأمثال:

“الرجل تدب مطرح ماتحب”

* * *

وانا صنعتى مســحـراتي في البلد جوال
حبيت ودبيت كما العاشق ليالي طوال
وكل شبر وحتة من بلدي

حته من كبدي

حته من موال:
أنا كنت فلاح وكان محراتي آه ورا آه
وكنت عامل ما حدش قدّره ورآه
وكنت شاعر تئن أقلامي يا ورقاه
دلوقتي صوتي فرايحي في العزيق والحرت
طبّلت أنا وسحّرت

قَبّلت انا وبحّرت

وصبحت أنا مســحـراتي سمع الدنيا
ودب مطرح ماحب وكلمته العُلْيَا
من فجر يوليه اللى شافه وطيِّبه ورقاه

فؤاد حداد- 1964، من ديوان المسحراتي- الهيئة العامة للكتاب 2011 –