المسحراتي فؤاد حداد: حرفة هواية

حرفه هوايه

اصحى يا نايم

وحّد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحّد الرزاق

رمضان كريم

مســحـراتى
مـنـقـراتى
باقول مرادى
أعيش وادادى
واخدم ولادى
أخدم بلادى
وانا المنادى
أول مُلبّى
كلامى مَيَّه
من نور عينىَّ
يشهد علىَّ
اللهُ ربّى
بالسر عالم
ولا كنت ظالم
ولا مستخبى
وعلى السلالم
وفرت دبى
من غير زوايا
مشيت فى دربى
درت بهوايا
وهواى دار بى
وحسّـى لعلع
الحى ولّع
أنا باب مخلّع
الخير فى ضبّى
وان قلت عجبى
السد أعجب
عيونه ستّه
حيفوت يكهرب
فى كل حته
والميه تركب
على بسكلته
من غير ما أركب
أنا نلت طلبى
حرفه هوايه
ودا سر طربى
طرت بهوايا
وهواى طار بى
عديت مطبّى
والمشى طاب لى
والدق على طبلى

ناس كانوا قبلى

قالوا فى الأمثال:

“الرجل تدب مطرح ماتحب”

* * *

وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى

حته من كبدى

حته من موال:
أنا لحبايبى حَبَابى القلب نادرها
ما هيش جواهر ياقوت باهر ونادرها
ولا مواهب ولا راهب بنى ديرها
فى كل يوم على كل الناس أنا اديرها
حبابى قلبى غيطان وحيطان منادرها
وتراب حوارى وشوارع فى بنادرها
كما أجنحه للحمام متعوّده ع السقف
رقصت دبيحه يامين يظبط عليها السقف
قوم شوف على السقف بترفرف بنادرها

فؤاد حداد- 1964، من ديوان المسحراتي- الهيئة العامة للكتاب 2011