“اللي متعرفوش” عن سوهاج.. خمسة سياحة في “بلد المواويل”

تصوير- أحمد دريم

مخنوق زهقان طهقان، اتجنن وروح اتفسح في سوهاج.. أيوه سوهاج.. متستغربش.. سوهاج بينها وبين القاهرة مسافة من 6 لـ7 ساعات بالكتير لو هاتسافر قطر، لو هاتروح بالسوبر جيت هاتدفع 110 جنيه، لو معاك عربيتك الخاصة، يبقى خد طريق الجيش الصحراوي وانطلق، الطريق دا هايختصرلك المسافة لأنه فاضي ومش زحمة، ولو ماشي بسرعة كويسة ممكن توصل في 5 ساعات بالكتير.

مواعيد قطارات سوهاج

لو هاتركب قطر فدي مواعيد الرحلات:

قطار رقم 2006 يتحرك من محطة القاهرة الساعة 5:40 ويصل إلى محطة سوهاج 12:30 صباحًا.

وقطار رقم 996 يتحرك من محطة القاهرة الساعة 10 مساءً ويصل إلى محطة سوهاج 5:30 صباحًا.

قطار رقم 2008 يتحرك من محطة القاهرة الساعة 11 مساءً ويصل إلى محطة سوهاج 6:30  صباحًا.

قطار رقم 1902 يتحرك من القاهرة 12:30 صباحًا ويصل إلى محطة سوهاج 7:30 مساءً.

كما أن النيل يقسم سوهاج نصفين: الشرق والغرب، لو هاتسافر بالقطر يبقى انت هاتنزل في الغرب عند مسجد العارف، أشهر جامع في المدينة، اتبنى في القرن الثامن الهجري، وجنبه القيسارية أشهر سوق.. أيضا في نفس المنطقة هاتلاقي أحلى محلات سمك مقلي، الوجبة الواحدة ما بين 15 لـ30 جنيه مش هاعرف أرشحلك حاجة كلهم أحلى من بعض.

أكلات سوهاج

أما لو كان نفسك في سمك بكل أنواعه جمبري، استاكوزا، بوري، كاليماري، مقلى مشوى،  فعندك مطعم أحمد عثمان للمأكولات البحرية، ودا توصله بسيرفيس بجنيه واحد لشارع الجمهورية، وبجنيه تاني ممكن تروح ميدان الثقافة، وهناك هاتلاقي  جحا أطعم محل كشري في سوهاج.

في مدينة سوهاج المواصلات كلها شبكة واحدة، من العارف تقدر تروح اي مكان (محافظة- ثقافة- شارع 15- حميات الخ) ومن أي مكان من دول تقدر تروح أي مكان في المدينة، والتعريفة جنيه واحد، أما تعريفة التاكسي 10 جنيه.

سرفيس سوهاج

لو انت لسة في العارف اركب أي سيرفيس بجنيه بينادي “محافظة”.. واطلب منه ينزلك عند الجامعة.. المنطقة دي فيها أكتر من فندق كلهم ع البحر.. أرشحلك فندق نايل تريجر، ودا فندق عائم على النيل خمس نجوم، مستوى الخدمة رائع.. بالإضافة إلى الطعام الشهي على سطح العبارة.. أسعار الحجز، غرفة مفردة وجهتها على النيل 250 جنيه ومزدوجة 350.. أما إذا كان الوجهة على الشارع فحجز الغرفة المفردة 220 والمزدوجة 300.

https://www.facebook.com/Niletrecer/?fref=ts

طيب لو ركبت عربية وأخدت الطريق الصحراوي، يبقى هاتنزل في الشرق في “المحافظة”.. اسمها كدا، ودي فيها أغلب الخدمات والفنادق.

جو سوهاج في الشتا أدفا من القاهرة بكتيير، المدينة مش زحمة.. وبعد الساعة 8 بالليل هاتلاقي هدوء وروقان.. ممكن تستغلهم في التمشية ع كوبري أخميم من الشرق للغرب أو العكس.

أجمل حاجة ممكن تشربها في سوهاج هي عصير القصب.. لأن القصب بيكون طازة مش متخزن من فترة، جرب تروح  “زيزو” أشهر محل قصب في شارع الجمهورية.. بس ما تطلبش قصب اطلب منه كوكتيل فاكهة.. حكاية.

غادر الفندق ليلا

بالليل ما تقعدش في الفندق انزل اتمشى.. واسأل عن شارع كازانوفا.. خد الشارع من أوله هاتلاقي مطاعم شعبية- مكتبات- محلات.. هاتلاقي فيه أكتر من قهوة، اقعد على قهوة الرحاب.. واستمتع بصوت الست وانت بتشرب مشروبك المفضل.

لكن لو ليك في القراية اركب سيرفيس بجينه.. واطلب منه ينزلك عند مكتبة رفاعة الطهطاوي.. هناك هاتلاقي مخطوطات مش كتب وبس.

بعد ما ترجع استعد عشان معانا طلعة الصبح بدري.. اقف قدام الفندق واركب أي سيرفيس بينادي “موقف” خمس دقايق هاتلاقي نفسك في موقف عربيات اركب عربية البلينا.. نص ساعة هاتكون في البلينا الأجرة 4 جنيه.. ومن البلينا مواصلة تاني لعرابة أبيدوس بـ2.5.

اختصار المسافة

لو عايز تختصر المسافة اركب قطر من للبلينا مباشرة ومن البلينا هاتنزل تتمشى شوية لحد الموقف وتركب عربية العرابة المدفونة، أو أبيدوس، الأجرة 2.5 جنيه، هاتنزل قدام معبد أبيدوس بالظبط، متضيعش وقت، ادخل  معبد أبيدوس رسوم الدخول 10 جنيه.

هناك هاتلاقي رسومات فرعونية وحكايات عن المعبد وأعمدة مش هاتصدق ازاي المصريين عملوا كدا، لأ وايه فيه نقوش بارزة ونقوش تانية العكس بقى.. غائرة، بس خد بالك المعبد بيفتح من الساعة 9 الصبح ويقفل الساعة 4 العصر.

هنا اقرا أكتر عن المعبد: http://weladelbalad.com/wp/267738-2/

خلصت جولتك في معبد أبيدوس، اركب أي عربية واطلع على جرجا، هاتلاقي عربيات مباشرة أجرتها 3.5، لازم تجرب تشرب شاي على قهاوي جرجا، أصلا قهاوي جرجا والبلينا مشهورين إنهم “تجار المية السخنة” J.

جرجا

أيضا في جرجا ممكن تزور أكتر من مكان تاريخي منهم الجامع الصيني.. كما يرجع تاريخه إلى العصر العثماني، أنشأه الأمير محمد بك الفقاري عام 1117 هجرية، وجامع جلال وعرف باسم المدرسة العثمانية، وهو مكون من 3 طوابق ويرجع تاريخه إلى عام1189 هجرية، وحمام على بك بجرجا ويقع بمنطقة القيسارية، أنشأه على بك الفقاري وهو عبارة عن 4 دواوين.

خلصت لفتك في جرجا ارجع بقى من حيث أتيت، ارتاح بقى عشان بكرة معاك جولة تاني بس المرة دي هاتكون في الشرق.

الصبح بدري بقى أي سيرفيس بـ2 جنيه وانزل أخميم، لازم تزور  جامع السلطان حسن، أنشأه الأمير حسن بن الأمير محمد سنة (1117 –1121 هجري).

اقرا أكتر عن أخميم: http://assayta.weladelbalad.com/28422-2/

من أخميم برضه، خد تاكسي بـ20 جنيه وانطلق إلى الدير الأبيض من أجمل الآثار القبطية، بناه الأنبا شنودة رئيس المتوحدين، اتسمى كدا عشان جدرانه من الحجر الجيري الأبيض، أكتر حاجة بتميزه الأعمدة والجدران العريضه، الحيطة عرضها متر ونص تقريبا.

الدير الأبيض

على مسافة 2 كيلو من الدير الأبيض هاتلاقي الدير الأحمر، أي سيرفيس بـ2.5 جنيه يطلع بيك الدير، واسمه دير الأنبا بيشوى أو الدير الأحمر، سموه كدا عشان جدرانه كلها مبنية من الجرانيت الأحمر، هاتستغرب من التصميم، وهاتشوف طريقة التحصين زمان كانوا بيعملوها ازاي.

كما يمكنك أن تقرأ عن الدير من هنا: https://goo.gl/AJ17sE

أيضا وانت راجع من هناك ممكن ناخد سيرفيس لنجع الدير ومن هناك اركب أي مواصلة على سوهاج بـ2، المسافة أصلا 12 كيلو مش بعيد عن سوهاج يعني.

في النهاية آخر حاجة لازم تزورها في سوهاج جزيرة الزهور وجزيرة قرمان، ودول في النيل، مش هايكلفوك غير معدية بـ50 قرش وهناك استجم كام ساعة وسط النيل، الجزيرتين فيهم خضرة وأشجار كتير، لو روحت جزيرة قرمان ابقى خد كورة معاك عشان فيه مساحة ممكن تلعب فيها كورة.