المسحراتي – فؤاد حداد (15)

كتبت القصائد من “صاحب ندا” إلى “مع السلامة” في رمضان 1388- نوفمبر 1968
صاحب ندا
كل ليلة
ِ
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
 
 
ســحـراتى
مـنـقـراتى
يا ابو الولاد
فى كل ليله
أنا فنى عيله
يجمع بلاد
فى ايدى طبله
تقول يا أبله
راجعى المواد
شايف جنينه
تقول يا نينه
امتى الميعاد
لما تفتّى
خلى يا ستى
نايب فؤاد
لابو الربابه
أقول يا بابا
والفن زاد
على راسى عمه
تقول يا عمّى
لمن أجاد
أبو قلب خالى
يقول يا خالى
للاعتماد
كل اللى يبنى
يقول يا ابنى
ويزيد جهاد
وتقول حماتى
يا روح حياتى
فين الإيراد
طبله فى ايدى
تقول يا سيدى
مدد   مداد
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
 
تبقى لى يا مسعدى يا فن تبقى لى
وربنا يمد فى أيامى وحبالى
واكتب كتاب فلسفه فى الشاى أبو النعناع
وفى طلعة الفجر والدنيا اللى فى بالى

 
المسحراتي – فؤاد حداد (14)