المسحراتي – فؤاد حداد (4)

القصائد من صاحب ندا إلى مع السلامة في رمضان 1388
نوفمبر 1968
من يوم عرابي
ِ
اصحى يا نايم
وحّد الدايم
وقول نويت
بكره إن حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى
مـنـقـراتى
يا دنيا هاتى
ويا بحر زيد
فى أرضى نابت
نبات جديد
فى عينى ثابت
هلال وليد
علىّ أطلع
فى كل مطلع
أنشد ويتبع
نشيد نشيد
كان وعد فاتنى
لكن لفتنى
تاريخ أفادنى
زلزال شديد
زرت الموالد
شيخ الشدايد
يا ركن صامد
أنا المريد
ساكن فى دارى
يحلف بتارى
يشهد فطارى
يوم الشهيد
يصرخ ترابى
من يوم عرابى
على المرابى
والمستفيد
عاوزين هلاكنا
عشان ملكنا
مصر وسلكنا
صراط حميد
ما عادش باطل
غير اللى عاطل
تعيش مناضل
انت السعيد
أنا جيل يفادى
أيام ولادى
يذكر جهادى
ابن وحفيد
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
أنا طول حياتى ضنا يا طول حياتك أم
يا مصر يا معلمانى الصبر والخضره
أنا الفقير الضعيف آمنت بالقدره
يا شبر ايدك فى قلب الليل هلال رجبى
نزل على وقال لى يا ضنا اكتب
ولا حد أغنى من المالك لسان عربى
ولا حد أقوى من اللى عمره ما بيكدب
يا شبر ايدك فى قلب الليل هلال رمضان
نزل على وقال لى اسهر على الأوطان
وانا طول حياتى ضنا يا طول حياتك أم
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي – فؤاد حداد (3)