المسحراتي فؤاد حداد: احفظ دروسك
احفظ دروسك
اصحى يا نايم
وحّد الدايم
وقول نويت
بكرة إن حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتي
مـنـقـراتي
باقول يا ليلي
وباقول يا عيني
راحت ليالي
وجَتْ ليالي
وكان سمرها
في العين نقاوة
لطلوع نهارها
في الروح حلاوة
ليالي نارها
على هداوة
شوف الشقاوة
الليل دا زى الـ
ـلي لسه عيِّل
والبدر ميِّل
عليه وقال له
احفظ دروسك
تاخد فلوسك
أصبح فانوسك
تقول يا حللو
أنا كأنّي
بدّلت سنّي
يا مسهرينّي
تعالوا حلّوا
أنا كنت لِبّة
وزدت حَبّة
صبحت قُبة
على تاج محلُّة
طالبين زيادة
من لبّه عادة
طالبين سعادة
السد علوا
وغنَّى شاعر
وعاد مهاجر
وكل قادر
وجد عمل له
الله كلامه
نشر سلامة
على اللي صاموا
وعلى اللي صلوا
والمشي طاب لي
والدق على طبلي
ناس كانوا قبلي
قالوا في الأمثال:
“الرجل تدب مطرح ماتحب”
* * *
وأنا صنعتي مســحـراتي في البلد جوال
حبيت ودبيت كما العاشق ليالي طوال
وكل شبر وحتة من بلدي
حتة من كبدي
حتة من موال:
من بورسعيد للصعيد يا مصر سابقه العيد
ولابسة أخضر جديد ومن المعادن تاج
ومنورة الدنيا بالأفراح وبالعناقيد
وطارحة صلب وحديد قبل الميعاد إنتاج
اصـحى يانايم وحّد الدايم
فؤاد حداد- 1964، من ديوان المسحراتي- الهيئة العامة للكتاب 2011
