المسحراتي فؤاد حداد: ليل رمضان

ليل رمضان

اصحى يا نايم

وحّد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحّد الرزاق

رمضان كريم

مســحـراتي
مـنـقـراتي
بادور وادور
يا فرْح قلبي
بيتنقل بي
من نور لنور
أشوف قبالي
على الطبالي
صحبة زهور
أقول يا زرعه
هاتي السحور
وانتي يا زلعه
سبع بحور
لقمه هنيّه
تكفى مِيّه
فى سلطانيّه
متسلطنه

قال الزبادي
وصلت انا

ست الحبايب
يا محضّنه

أنا اللي أصلى
روح الضنى

واخضر بقشره
أسمر فى قدره
أقول له إطرا
ويقول لى غمِّس
خلص المدمس
يا مين يحمّس
لنا الوابور

قامت الرقيقه
أختى الشقيقه
قالت دقيقه
والشاي يدور
الله يخلّى
البرتقانه
طلبت احلّى
قالت لي أنا
شوف الشعور

والمشي طاب لي
والدق على طبلي

ناس كانوا قبلى

قالوا فى الأمثال:

“الرجل تدب مطرح ماتحب”

* * *

وانا صنعتى مســحـراتي فى البلد جوال
حبيت ودبيت كما العاشق ليالي طوال
وكل شبر وحته من بلدي

حته من كبدي

حته من موال:
أنا اللى شفت الرياح تسكن قصب مسحور
شفت الجبال تتنقل والبحر يرمى بحور
ولا شفت ليل في الليالي زي ليل رمضان
ولا فجر أطيب من الفجر اللي بعد السحور

فؤاد حداد- 1964، من ديوان المسحراتي- الهيئة العامة للكتاب 2011 –