المسحراتي فؤاد حداد: مهما ألِفّ
مهما ألِفّ
اصحى يا نايم
وحّد الدايم
وقول نويت
بكرة إن حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتي
مـنـقـراتي
على الصراطِ
زي الألف
مهما ألفّ
ويدور حِواري
مع الحَواري
وخيالي جاري
زي الألف
مهما ألفّ
والليل يطوِّل
والناي يموِّل
وانا قلبي أوِّل
زي الألف
مهما ألفّ
قول للموائد
أنا قلبي واخد
على إنه واحد
زي الألف
مهما ألفّ
أنا اللي أركع
لله وأرفع
راسي وأرجع
زي الألف
مهما ألفّ
وباقول يا همزة
يا ام التلامذة
فوقي انفتحتِ
أنا اللي شايلِك
مكسوره تحتي
أشكر جمايلك
همزة يا همزة
أكتب ما أكتب
لا في سري همسة
ولا عمري أكدب
حواسّي خمسة
وصوابعي خمسة
على خط خمسة
المشي طاب لي
والدق على طبلي
ناس كانوا قبلي
قالوا في الأمثال:
“الرجل تدب مطرح ماتحب”
وأنا صنعتي مســحـراتي في البلد جوال
حبيت ودبيت كما العاشق ليالي طوال
وكل شبر وحتة من بلدي
حتة من كبدي
حتة من موال:
هي المنازل بتتبادل حواديتها
والا الحواري بتتصنت في حَوْدِتها
أدي طبلتي رققت ودي إيدي هاوْدِتها
ودي قلبي سلّم وعيني سلّمت بهيام
على الليالي وعلى الأيام وعَوْدتها
اصـحى يانايم وحّد الدايم
فؤاد حداد- 1964، من ديوان المسحراتي- الهيئة العامة للكتاب- 2011
