مش بس تونس.. تعالا نقولك تروح فين تاني في الفيوم

مهرجان تونس للخزف والفخار على الأبواب، من 1 وحتى 3 نوفمبر 2018، “ولاد البلد” هتدلك على أجمل الأماكن السياحية في الفيوم عمومًا، وأهم مزارات قرية تونس بوجه خاص.

الطريق إلى تونس

وأنت جاي من القاهرة عشان تحضر مهرجان تونس للخزف والفخار، أول ما هتنزل من العربية في موقف “القاهرة – الفيوم”، هتقابلك في مدخل المدينة أقدم مسلة موجودة في المحافظة، وهي مسلة الملك سنوسرت الأول، من ملوك الأسرة الـ 12 في عصر الدولة الوسطي، وعليها نقوش للقدماء المصريين هتنبهر لما تشوفها.
ولو اتمشيت شوية بالعربية عند مفارق دله، هتلاقي حديقة حيوان الفيوم، هتلاقي فيها بيت للزواحف على شكل هرمي، وتتميز بطبيعة خلابة وحشائش خضراء، وملاهي كمان للأطفال.
ولما تعدي على منطقة دله مرورًا بمنطقة السواقي، هتلاقي سواقي الهدير، ويعد أشهرها السواقي الأربع الموجودة في ميدان وسط البلد بجوار قصر الثقافة.
وأنت في وسط المدينة لوليك في السياحة الدينية، يبقى متنساش تزور أقدم 3 مساجد آثرية بالفيوم، 10 دقايق من وسط البلد بالتاكسي أو بعربيتك، هتلاقي مسجد الأمير سليمان “المعلق”، ومن هنا لوبصيت يمينك هتلاقي مسجد علي الروبي، وعلى كوبري الصوفي هتلاقي مسجد خوند أصلباي ”قايتباي”.
وأنت رايح لتونس هتعدي على مدينة أبشواي، المشهورة بأقدم سينما في مصر ومحراب الفن “سينما نبيل“.
بعديها هتعدي علي قرية شكشكوك، وهتلاقي بحيرة قارون، ومن البحيرة هتتمشى بالعربية هتلاقي وادي الريان، وهناك بقى هتتزحلق على الرمال وهتلاقي السفاري كمان، وسياحة اليوم الواحد، وهتتصور مع الشلالات، وهتتسلق على جبل المدورة، وهتعمل فوتوسيشن كمان في مكان ما سجل أحمد مكي أغنيتة الأخيرة “أغلى من الياقوت”، بجوار البحيرة السحرية اللي بيتغير لونها حسب فترات اليوم.
وعلى مسافة 38 كم تقريبًا من منطقة الشلالات، هتلاقي أول “منطقة تراث طبيعي” في مصر، متحف وادي الحيتان ويقع في حدود محمية وادي الريان.
ولو عاوز بقي تزور قصر قارون، ده بقي موقع أثري هتلاقي كمان في القصر معبد الآله سوبك، يقع بالقرب من بحيرة قارون، وكمان مشهور بحدث تعامد الشمس في 21 ديسمبر من كل عام.
وأنت رايح مهرجان تونس بنرشحلك تزور قرية النزلة التابعة لمركز يوسف الصديق قبل قرية تونس، هتلاقي هناك أقدم منطقة لصناعة الفخار، وكمان شيخ الفخارين صاحب الصنعة الأصلية.
تيجي بقي لقرية تونس هتلاقيها قطعة فعلًا من تونس الخضرا، هتلاقيها على ضفاف بحيرة قارون، ميفوتكش المهرجان، لأنه ميتحكيش عليه هتلاقي فيه فقرات فنية وعروض موسيقية، ومدرسة الخزف اللي بتديرها الفنانة السويسرية إيفلين.
وأنت في مهرجان تونس هتلاقي سيدة مصرية بملابس ريفية، وتعد من أشهر مصدرات منتجات الخوص على مستوي الجمهورية..  الست كاملة
وهتلاقي كمان  قعدة عرب عشان لو عاوز تاكل فطير مشلتت ومش وعسل أسود، وكمان هتشرب شاي على الكانون.
ولو عاوز فندق خلال أيام المهرجان عشان متروحش وتيجي، هتلاقي فنادق هتعيشك أجواء الريف العربي، وكمان الفاخرة على الطراز الملكي.. إقرأ هنا
وأنت في قرية تونس ميفوتكش زيارة متحف الكاريكاتير للفنان محمد عبلة، ورسم دخول المتحف 5 جنيهات.

إزاي هتوصل

تعالا بقى نقولك إزاي تروح الأماكن دي كلها، لو أنت جاي من القاهرة وعاوز تروح قرية تونس، هتنزل من عربية القاهرة في “موقف القاهرة – الفيوم”، وهتركب تاكسي بـ8 جنيهات لموقف أبشواي، ومنها هتركب سيارة بـ3 جنيهات، وهتنزل في موقف قارون بمركز أبشواي، ومنها هتنزل في مفارق يوسف الصديق بـ 3 جنيهات مدة المواصلة ساعة، ومن المفارق هتركب توك توك بـ 15 جنيهًا، أو أي عربية تانية وهتلاقي نفسك في تونس خلال نصف ساعة.
ولو أنت عاوز تروح بحيرة قارون، تقدر لو أنت في المدينة تركب تاكسي بـ 150 جنيهًا، أو عربيات أجرة من موقف سنهور رايحة البحيرة، ودي أجرتها 4 جنيه بس.
أما لو معاك عربيتك، وأنت من القاهرة أو الجيزة، تقدر توصل الفيوم في أقل من ساعتين، من ميدان الرماية وتاخد طريق الفيوم، أو من أكتوبر وتاخد طريق الواحات اللي هيوصلك للفيوم.
ولو حابب تركب ميكروباص يبقى عندك 4 نقاط للتحرك، الأولى من المنيب والأجرة 20 جنيهًا، والتانية من رمسيس جنب موقف أحمد حلمي، والأجرة 20 جنيهًا، والتالتة من المرج، والأجرة 20 جنيهًا، وكمان تقدر تركب من ميدان الجيزة، أو تركب من أكتوبر من ميدان الحصري أو من الموقف بتاع الحي السادس، وبرضه الأجرة بـ 20 جنيه، وأقرب وأسرع نقطة انطلاق هي ميدان الرماية.
ولو عاوز تركب سوبر جيت، يبقى هتروح المنيب أو رمسيس، وبعد ماتوصل للفيوم من هنا هتركب تاكسي، هيوصلك لأي مكان عاوز توصله في الفيوم.
مش بس كدة ده كمان في قطار من القاهرة للفيوم، رقم 1106 قيام من القاهرة الساعه 6:45 صباحًا إلى الفيوم، وده قطار إكسبريس مميز، وكمان في قطار رقم 1110 قيام من القاهره الساعه 3:45 عصرًا إلى الفيوم وده  قطار إكسبريس مميز.

أسعار التذاكر

من الفيوم إلى محافظة الجيزة سعر تذكرة القطار “المطول” 3.25 جنيه، و “المميز” 6 جنيهات.
ومن الفيوم إلى القاهرة سعر تذكرة القطار المميز 7 جنيهات، وسعر التذكرة من محافظة الفيوم إلى محافظة الأسكندرية ” المميز”،  15 جنيهًا، والمكيف 40 جنيهًا.