المسحراتي30| أشعار فؤاد حداد.. مغامرات الطلبة
كتب – فؤاد حداد
تصوير – سمر شومان
مغامرات الطبله
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى الحى ومـنـقـراتى
مغامرات الطبله ومغامراتى
حكاية القلب الودود الحسيس
دى طبله قالت مصر يا أمنا
نادت على المؤمن على المؤمنه
بشهامة الصادق وهمس الأنيس
دقت ورقت واستحقت هديه
نطقت وقوره بلهجة الأستاذيه
ضربت عفيه بلهجة العتريس
تقابلها ودن عجين تلت وتعجن
لكن لا بتسرسع ولابتطجن
دى هى نسمه ترف بين السبل
وريح تدمدم فى علالى الجبل
وبحر قدم افتحوا له الهويس
يالهفة الباب اللى راجع يخبط
يا صدر عصفوره بيعلى ويهبط
تحسبها غطست فى الظلام الغطيس
تلاقيها شبت زى شمس الضحى
هى الخفيفه زى ضحكة جحا
هى اللى دارت دمعه تحت البواكى
هى اللى قالت للنجوم أهواك
هى اللى شربت روح من الفوانيس
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
يا طبلتى أنا مين؟
انت اللى شايلنى
يا كلمتى أنا مين؟
انت اللى قايلنى
دول ردوا بالصدق والا القلب خايلنى
مصر اللى بتقول وانا بانقل بحس أمين
واغنى وادعى بدقـة قـلـبـهـا
آمين
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
