المسحراتي29| أشعار فؤاد حداد.. لغة الأصول

كتب – فؤاد حداد
تصوير – سمر شومان
لغة الأصول


اصحى يا نايم

وحّد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحّد الرزاق

رمضان كريم



مســحـراتى
مـنـقـراتى
شفت فى حياتى
رمضان مصيف
رمضان مشتى
يرجع ويصدف
يعود ويأتى
كل الفصول
وانا لسه باحبى
على ترابها
ومصر قلبى
يدق بابها
يرجو القبول
وياما ياما
الناس لقونى
على المقامه
طافت عيونى
ومستهامه
ساعة ما عادت
إلىّ جادت
بما أفادت
من الذهول
وخد بيدى
والليل مندّى
والحى آهل
ما اسمعش جاهل
ولا عذول
وحشنى الأزهر
وشايه الأخضر
وحشنى أعتر
فى كل خطوه
بسحاب معطر
ومعانى تغوى
لغة الأصول
مائى سمائى
نوح السواقى
أعيش أرمًّض
أدور ألاقى
أحلم أغمض
أنشد أقول
ما احلا الفواتح
من كل مَسْعَى
النهج واضح
والرحمه واسعه
وفى الحبل طول  والمشى طاب لى


         والدق على طبلى

ناس كانوا قبلى

          قالوا فى الأمثال:

“الرجل تدب مطرح ماتحب”