المسحراتي 23| أشعار فؤاد حداد.. جمال عبدالناصر
كتب – فؤاد حداد
تصوير – سمر شومان
جمال عبد الناصر
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
المسحراتي فى الطل راجع
ومطلع الشمس قبلتى
مـنـقـراتى يا طبلتى
وصوتى زيك من المواجع
شباك يا مطفى وشباك يا والع
دارت ليالى ولفت سنه
وجت فى ودنى آه يا ضنى
أكنى باسمع صوتى أنا
ولسه باتعلم الكلام
واجرب الحزن والمواجع
والاقى كل الزمن يدور
وباطلب الحسنى فى الختام
كل اتجاه الليالى نور
أحسنت يا صاحب المقام
يا هادى لولادى الابتسام
وهادى لعينيهم البريق
فاتح لهم روضة العلام
شوف زرع إيدك معنى وعدد
يفرش على آخر المدد
أخضر لأخضر توأم شقيق
وقفت فى مطرحى الطليق
أنادى من ساعة الظلام
يا طول شعاع الفجر
فى قلب صادق يمشى الطريق
على مباديء عدل وسلام
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
فين طلتك فى الدقايق تسبق المواعيد
والابتسامه اللى أحلى من السلام بالإيد
أؤمر لى بحقوقى وهدوم الولاد فى العيد
والمجانيه ومرايل بيضا والأناشيد
يا فجر يا حضن مصرى يا أحن شهيد
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
