المسحراتي- فؤاد حداد (22)

كتبت القصائد من صاحب ندا إلى مع السلامه فى رمضان 1388
نوفمبر 1968
يا رب
ِ
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى
مـنـقـراتى
أرتـاح دقيـقه من لفـتى
وارفع ايدىّ
وتقوم عينىّ
وقـلبى يـعـلا وشـفتى
يا حى باقى
اسمع دعائى
واغفر لى ضـعفى وخفتى
يا رب عطفك
أنا لولا لطفك
ايدى ما تـملكـشـى دفتى
اهدينى رحمه
ودنيا رحبه
أتقن جهـادى وحـرفـتى
واجعل حياتى
حاضر وآتى
ما اخجـلش منها فى وقفتى
ولاجل أمٍ
بصدر مؤمن
يــا رب بـارك فى خلفتى
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
دى هى كلمه لشعبى ولقمه لولادى
ما اطلبش غيرها وغير الحق فى جهادى
يا رب يا هادى
أنا بحق الليله دى أسألك يا رب
كرامة المؤمنين والنصر لبلادى
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق