المسحراتي فؤاد حداد: في الغيط نقاية
في الغيط نقاية
اصحى يا نايم
وحد الدايم
وقول نويت
بكرة إن حييت
الشهر صايم
والفجر قايم
اصحى يا نايم
وحد الرزاق
رمضان كريم
مسحراتي
منقراتي
في غيط حراتي
طرح كلام
آه يا سلام
أنا قلت إيه
ورميت شقايا
في الغيط نقاية
طرح كلام
اه يا سلام
خلعت بابي
ورميت شبابي
فى الغيط حبابي
طرح كلام
آه يا سلام
وادور مغمي
واسقي بدمي
آه يا سلام
كده قلبي وافي
الغيط يا عمي
طرح كلام
اه يا سلام
كده القوافي
تقول قوافي
كده طوافي
طرح كلام
آه يا سلام
كدا قلبي وافي
للي انكتب لي
ياليل عوافي
والمشي طاب لي
والدق على طبلي
ناس كانوا قبلي
قالوا في الأمثال
“الرجل تدب مطرح ما تحب”
وأنا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحتة من بلدي
حتة من كبدي
حتة من موال
حتة من بلدي حتة لأم أولادي
بنيت لها عش بعيدان الأمل ورموش
كان قلبي فاعل يغني في المقاولة دي
ويقول شكرت العواذل اللي ما بيرموش
ويقول شكرت العواذل اللي يرمونا
ما كنتش اضرب ضلوعي لولا المونا
ولا أضرب المونه أبنى لأم أولادى
اصحى يا نايم وحد الدايم
السعي للصوم خير من النوم
دى ليالى سمحة نجومها سبحة
اصحى يا نايم يا نايم اصحى وحد الرزاق
فؤاد حداد- 1964، من ديوان المسحراتي- الهيئة العامة للكتاب 2011
