المسحراتي فؤاد حداد: الأشيا معدن

الأشيا معدن

اصحى يا نايم

وحّد الدايم

وقول نويت

بكرةإن حييت

الشهر صايم

والفجر قايم

اصحى يا نايم

وحّد الرزاق

رمضان كريم

مســحـراتي
مـنـقـراتي
لقَيْتُ أهلًا
نزلتُ سهلًا
الأرض بِرْحه
والأشيا معدن
وليالى سمحة
نجومها سبحة
إن كنت نايم
يا نايم اصحى
شوف قلبى هايم
وأخدني فسحة
مافيش مآسى
على غير مقاسي
يا أبو قلب قاسي
ما بطّلوا دا
فى مصر ثورة
عفيّه قادرة
أيادي سمرا
وأنفاس ودودة
وأيام تزامل
فلاح وعامل
بالخير حوامل
الخير ولودة
واللى في خيالي
صبح محقّق
أحضن عيالي
وابوس وازقق
وانشد ليالي
بقصب يزقزق
باشيل تلالي
بالكوم وباعزق
في نجوم تلالي
عمال أبعزق
والمشي طاب لي
والدق على طبلي

ناس كانوا قبلي

قالوا فى الأمثال:

“الرجل تدب مطرح ماتحب”

* * *

وانا صنعتى مســحـراتي في البلد جوال
حبيت ودبيت كما العاشق ليالي طوال
وكل شبر وحته من بلدى

حته من كبدى

حته من موال:
بلدى على النيل ، وساكن عشّ وبنانى
والحمد لله بنيت السد وبناني
غنيت وعشت الأمل وسجدت فى رمضان
للى خلقنى وعلمنى البيان رحمن
قادر يسوى بناني

فؤاد حداد- 1964، من ديوان المسحراتي- الهيئة العامة للكتاب 2011