المسحراتي فؤاد حداد: أبو فصادة

أبو فصادة

اصحى يا نايم

وحّد الدايم

وقول نويت

بكرة إن حييت

الشهر صايم

والفجر قايم

اصحى يا نايم

وحّد الرزاق

رمضان كريم

مســحـراتي
مـنـقـراتي
مغنواتى
وكلامي دوّا
لازم يُدَوَّن
في من تلوّى
ومن تلوَّن
كمثل سمكة
بتعوم فى كنكة
وعامل لى راجل
شديد في بأسه
ع الخضةه أخضر
ع الصفرة أصفر
ع البيضة أبيض
والكل فاقسه
لكن ما هَمِّش
صاحبنا هَمِّش
على الدفاتر
وقال تآنسوا
بيروقراطي
يقول قيراطي
فدان بيطرح
دهب بلمسة
فدان بيطرح
من غير ما أفلح
غيري اللي يسرح
ورا  جمايسـه
لكن الحكاية
لها نهاية
الريش حيسقط
اللي أنت لابسه
أراد صيدا
وكاد كيدا
أبو فصاده
فصاد نفسه
مثل ضربته
والا انضرب لي
على غرابته
والمشي طاب لي

والدق على طبلي

ناس كانوا قبلي

قالوا فى الأمثال:

“الرجل تدب مطرح ماتحب”

وانا صنعتي مســحـراتي في البلد جوال
حبيت ودبيت كما العاشق ليالي طوال
وكل شبر وحته من بلدي

حته من كبدي

حتة من موال:
كان عندي زغلول ورايح للطبيب عارضُه
جسمه رقيق ما تعرف طوله من عرضُه
خده انجرح فى النسيم لما النسيم عارضُه
يا للى حزين ع اللى فات وقتلت زغلولي
كان عندي حَبّ الدُره أبرك من اللولي
حزنك على مال مكلفنى الشقا والغم
والدمع والدم من عينى ومن عين أبي
آدي البلد نورت بالورد والعنبِ
ورجع لي زغلولي مالك ثورته وعرضُه

فؤاد حداد- 1964، من ديوان المسحراتي- الهيئة العامة للكتاب 2011 –