الكعك .. مسحراتى فؤاد حداد
الكعك
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
كتب: الشاعر فؤاد حداد
تصوير سمر شومان
الكعك
ِ
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى
مـنـقـراتى
خالاتى عماتى سيداتى
على تل عجوه وعسل وسمن
ولا مجلس الأمن سهرانين
لت وعجين
يبنوا الهرم
قالت حماة المحترم
يا كعك يا سيد الكرم
نبطلك فى المشمشى
يا بنت قومى وفرفشى
لا تحوشى
ولا تختشى
أحمى الوابور واستحمشى
إشى وإشى
تلاقيه مشى
إشى نغبشى
واشى حبشى
واشى دندشى
واشى انقشى
واشى ينحشى
واشى رشرشى
سكر عليه
بركة ايديه
فرحة عينيه
قال ايه وايه
المشى طاب له
والدق على طبله
ناس كانوا قبله
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
قال واحد اتنين تلاته واللى كان فى الجرن
كله انفتل وانقتل وانشال وراح الفرن
عينى على رصّه راحت والا رصّه جات
عمال اسحر وأنا ماشى ورا الصاجات
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
