المسحراتي32| أشعار فؤاد حداد.. عين جالوت
كتب – فؤاد حداد
تصوير: سمر شومان
عين جالوت
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى
مـنـقـراتى
الدنيا تصحى على دبيبى
فى إيدى طبله رمضان حبيبى
نغمها شامى ونغمها ليبى
نغمها مصرى عسلى وحليبى
نغمها واحد يادنيا طيبى
نغمها سارب بين البيوت
ونغمها ضارب فى عين جالوت
وصلاح محارب زاح الطاغوت
وبيبرس غالب جيش الصليبى
ونغمها طالب نغم شقيق
دق الرحايه على الدقيق
من الجهاد والعرق نصيبى
ونغمها مسعد ونغمها زين
ونغمها موعد للعودتين
ضمينى أرض وشوفينى عين
ياقدس ياما حتفرحى بى
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
الفاتحين من جهات الشمس للمغرب
العاملين بالهدى كانوا سيوف تكتب
ولا يعيد مجدهم فى كافة الأمصار
غير إيد توحّد وتعلى راية الثوار
وإيد تجاهد وإيد تزرع وإيد تبنى
وإيد تزيد الطريحه الأوله وتتنى
صلب وحديد لما تعرق من عطشها النار
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
2 تعليقات