المسحراتي20| أشعار فؤاد حداد.. أميرة بنت السيد

كتب – فؤاد حداد

تصوير – سمر شومان

المسحراتي20
20- أميره بنت السيد
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى سحر نادى
مـنـقـراتى وبانادى
على القمر بنتى أميره
الليل على اكتافها ضفيره
ضحكتها فى الحى منيره
ضحكتها بردى وسلامى
نغم يزهّر أنغامى
و سعد يمشى على اقدامى
ضحكتها يا روحى يا روحى
حنينه وردت روحى
ضحكتها قله منديه
وعيش وملح الحريه
ومهما اشوف الليل ظلمه
والدنيا مهما تكون ظالمه
ضحكتها للدنيا براءه
تحت النجوم البراقه
ضحكتها تفتح أحضانى
تاخدنى للشط التانى
ضحكتها بدر الرمضانى
ضحكتها مصر المنصوره
قمر أميره أموره
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
فى ضحك بنتى أميره وضحك بنتى إيناس
جناين الإنسانيه يا قمر ونّاس
لفيت معاك البلد والحى والسامر
وفى كل بيت التقيت حب الضنى آمر
والبنت فى مهدها هى اللى ست الناس
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي19| أشعار فؤاد حداد.. قلب واحد
المسحراتي18| أشعار فؤاد حداد.. صنايعي دِقّى
المسحراتي17| أشعار فؤاد حداد.. حي المدامع والابتسام
المسحراتي16| أشعار فؤاد حداد.. والله زمان
المسحراتي15 | أشعار فؤاد حداد.. حاج راضي
المسحراتي14| أشعار فؤاد حداد.. نفس ترياق
المسحراتي13| أشعار فؤاد حداد.. قاعد يذاكر
المسحراتي12| أشعار فؤاد حداد.. ربيع الشام
المسحراتي11| أشعار فؤاد حداد.. النوبة يا أسمر
المسحراتي10| أشعار فؤاد حداد.. صاحب حسن ونعيمة
المسحراتي9| أشعار فؤاد حداد.. وردة ما بتدبلش
المسحراتي8| أشعار فؤاد حداد.. السيد البدوي
المسحراتي7| أشعار فؤاد حداد.. صورة تعدل صورة
المسحراتي6| أشعار فؤاد حداد.. كوبري إمبابة
المسحراتي5| أشعار فؤاد حداد.. يوم العمل يوم عيد
المسحراتي 4| أشعار فؤاد حداد.. تونس الخضرا
المسحراتي3| أشعار فؤاد حداد.. تعرفني من صوتي

المسحراتي2| أشعار فؤاد حداد.. الحق واجب

المسحراتي 1| أشعار فؤاد حداد.. تاج المدينة أبوزيد هلال