المسحراتي- فؤاد حداد (2)

كتبت القصائد من صاحب ندا إلى مع السلامه فى رمضان 1388
نوفمبر 1968
سُنْبُلى
ِ
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى
مـنـقـراتى
أمل حياتى فيما يلى
اذا الحديد الحديد بُلى
تعيش وتطرح يا سنبلى
كما تجلى للمجتلى
هلال معاود وهل لى
يا مصر قومى وهللى
من الأغانى تمولى
بحر الأمانى وتنوّلى
دا بكره يكمل وتكملى
وتقولى بدر التمام حِلى
لما تحلى بمكاحلى
هلال ما اظنش قلبه خلى
دا فى سمانا
لاجل الأمانه
هلال مقامه بمقام ولى
وأنا عليت زى ما عِلى
وأنا كمثله فى أوِّلى
عينى رأت، إيدى طبِّلى
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
تركت أهل المدارك يختموا السهره
ومشيت بطول الخليج للسيده الطاهْره
أما المقام سندسى أما المدد نظره
وخد فى حضنك جناين قد ما تقدر
أخضر فى أخضر ومن كُم الهلال زهره
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
فؤاد حداد

المسحراتي- فؤاد حداد (1)