المسحراتي – فؤاد حداد (14)
![تصوير - أحمد دريم](https://dla7m3h3caipg.cloudfront.net/wp-content/uploads/2017/05/1496670386_800_98586_18816751_10155146816306970_432383575_n.jpg)
كتبت القصائد من “صاحب ندا” إلى “مع السلامة” في رمضان 1388- نوفمبر 1968
صاحب ندا
نجف
ِ
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى
مـنـقـراتى
بنقره نقره أمس والمس
بيد ياما عاشت تغمّس
أيام أليّل وايام أشمّس
واسرح من الفجر بالمدمس
وفى العصارى بدُرَه وترْمس
ما اعرفش اربّع أعرف أخمّس
لا عيون حبايبى ولا عينى تنعس
وفى كل حى وفى كل مجلس
أنا ودنى أتقل من اللى وسوس
ويفتح الله عقلى المتربس
نجف ملعلع ما اعرفش أهمس
أعرف أدوّى بصوت يحمس
والليل دا عندى تختة مدرس
باسرح وباشرح من غير ما ادعبس
أما مزاجى عمره ما فلس
دا انا ابنى قال يا اوسطى للمهندس
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
يا عم يا سقا يا اللى قربتك لاقّه
أنا بادّى ودنى لكل الدنيا واتلقّى
الأوله أى نعم والثانيه مش لأه
والتالته دى الميه فى الحنفيه والمواسير
وانا طبلتى فى الإذاعه دقةً دقه
اصـحى يانايم | وحّد الدايم | |
السعىُ للصوم | خيرٌ من النوم | |
دى ليالى سمحه | نجومها سبحه | |
اصـحى يانايم | يانايم اصحى | وحّد الرزاق |