المسحراتي فؤاد حداد: أنا اشتراكي
أنا اشتراكي
اصحى يا نايم
وحّد الدايم
وقول نويت
بكرة إن حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتي
مـنـقـراتي
في مذكراتي
عن عهد بائد
ولا عمره عائد
طلعت لي غنوة
لا تقول لي حلوة
ولا سفيهة
فيها اللي فيها
باغني واحكي
غنوة حكاية
كان فيها ضحكي
فيها بكايا
اسمع يا ولدي
العين بصيرة
والإيد قصيرة
والفقر لابد
على الحصيرة
بيقول يا عابد
زحزحني
والزير حدايا
من البداية
وانا اللي سانده
على النقاية
بيقول يا عبده
زعزعني
والقلب شابي
على الغلابة
رفع عليَّ
قوس الربابة
وقال يا بابا
زغزغني
اسمع يا ولدي
من غير شماتة
دلوقتى ردّي
على التلاتة
بنيت في سدّي
زعزعت زيري
على مزاجي
يا إقطاعيّة
وغار أذاكِ
زغزغ لي قلبى
عدوّ باكي
زحزحت فقري
وانا فداكِ
يا مصر لمّا
لقيت ضناكِ
اول ما يَنْشَأ
حرية ينشَق
أول ما ينطق
يقول وراكِ
أنا اشتراكي
يا مصر ياللي
اسمك في ريقي
عارف طريقي
والمشى طاب لي
والدق على طبلي
ناس كانوا قبلي
قالوا في الأمثال:
“الرجل تدب مطرح ماتحب”
فؤاد حداد- 1964، من ديوان المسحراتي- الهيئة العامة للكتاب 2011
